ख्वप भाद्र, १३ गते २०७९
मध्यपुर थिमि नगरपालिकाले नवनिर्वाचित जनप्रतिनिधिहरुको कार्यकालको १०० दिनको अवसरमा सोमवार एकै दिन तीन वटा शहरी स्वास्थ्य क्लिनिक सञ्चालनमा ल्याएको छ । कार्यकाल शुरु भएको सय दिन पुगेको अवसरमा ९ वटा वडामध्ये हेल्थ पोष्ट नभएका तिन वडा २, ३ र ५ वडामा सोमवार नगर प्रमुखले उद्घाटन गरि क्लिनिक सञ्चालनमा ल्याएको हो । वडा नं.२ को सानो थिमिस्थित नाट्श्वरी बहुउद्देश्य भवनमा, वडा नं. ३ को वडा कार्यालय भवन कौशलटारमा र वडा नं. ५ को भुँलाखेलमा रहेका छन । 
क्लिनिकमा जनस्वास्थ्य निरिक्षक अघिकृत छैंटो तहको नेतृत्वमा हाललाई सि.अहेव र सि. अनमी गरी तीन जना गरि नगरभित्रका हेल्थ पोष्टमा भएका स्वास्थ्यकर्मीबाट शहरी क्लिनिकको जनशक्ति व्यवस्थापन गरिएको हो ।आजबाट सञ्चालित क्लिनिकमा गर्भवती जाँच, सामान्य बिरामी जाँच, घाउ खटिराको चिरफार र ड्रेसिङ, परिवार नियोजनका अस्थायी साधनहरुको वितरण, नेपाल सरकारबाट तोकिएका औषधीहरुको निःशुल्क वितरण जस्ता सेवा प्रवाह हुने नगर प्रमुख सुरेन्द्र श्रेष्ठले बताउँनुभयो । नगरप्रमुख श्रेष्ठले निर्वाचनमा जनता समक्ष गरेको वाचा र प्रतिवद्धता पुरा गर्ने एक खुडकिलोको रुपमा शहरी स्वास्थ्य क्लिनिक सञ्चालनमा ल्याएको बताउनुभयो । उहाँले कार्यकालको सय दिन नपुग्दै हालै नगरका ५ र ७ वडाका ५१९ परिवारलाई स्वबासी जग्गाको धनीपुर्जा वितरण गरेको, चार वटा ऐन निर्माण गरी कार्यान्वयनमा ल्याएको र त्यसमा आवश्यक नीति र कार्यविधि निर्माण भइरहेको, आगामी पुसमा नगरसभा बैठक आयोजना गरी थप नीति, नियम र ऐनहरु निर्माण गर्ने लक्ष्य रहेको पनि जानकारी दिनुभयो ।

त्यस्तै उद्घाटन कार्यक्रममा बोल्दै नगर उपप्रमुख विजयकृष्ण श्रेष्ठले पद बहाली भएको सय दिनको उपलब्धीका रुपमा जनताको आधारभुत अधिकार र मौलिक अधिकारभित्र रहेको स्वास्थ्य अधिकारलाई प्रत्याभुती दिने उद्देश्यले नगरपालिकाले हेल्थ पोष्ट नभएका वडाहरुमा शहरी स्वास्थ्य क्लिनिक सञ्चालनमा ल्याएको बताउनुभयो । आब छिट्टै नगरपालिकाद्धारा सञ्चालित नेपाल कोरिया मैत्री नगरपालिका अस्पतालका दक्ष चिकित्सक, एमबिबिएस डाक्टर र नर्सहरुको व्यवस्थापन गरी क्लिनिकको सेवा बिस्तार गरिने पनि उहाँले जानकारी दिनुभयो ।